महाबळेश्वर : गेल्या दोन दिवसांपासून महाबळेश्वरमध्ये थंडीचा जोर वाढत चालला आहे. प्रसिद्ध वेण्णा तलाव परिसरात तर थंडी अधिकच जाणवत आहे. त्यामुळे स्थानिक नागरिकांसह पर्यटक दिवसभर गरम कपडे, शाली, स्वेटर्स, वूलनचे कपडे घालून फिरताना दिसत आहेत.
अनेक ठिकाणी शेकोट्या पेटवून त्याभोवती नागरिक शेकत बसल्याचे चित्र दिसत आहे. सहा जानेवारी २०२० रोजी महाबळेश्वरातील कमाल तापमान २३.७ अंश सेल्सिअस, तर किमान तापमान १२ अंश सेल्सिअस नोंदवले गेले. सात जानेवारीला थंडीचा जोर आणखीच वाढला होता. त्यामुळे प्रसिद्ध वेण्णा तलावावर सहा-सात जानेवारीला भल्या पहाटेपासून धुके मोठ्या प्रमाणात दिसत होत्या. त्यामुळे जणू धुक्याची चादरच पसरल्याचे दृश्य सध्या पाहायला मिळते आहे. सकाळी वेण्णा तलावावर गेलेले नागरिक मनमुरादपणे याचा आनंद लुटत आहेत. त्यामुळे महाबळेश्वरमधील थंडी अनुभवण्यासाठी जाऊ इच्छिणाऱ्या पर्यटकांसाठी आदर्श स्थिती निर्माण झाली आहे.
(महाबळेश्वर पर्यटनासंदर्भातील माहिती देणारा लेख वाचण्यासाठी येथे क्लिक करा.)